cousas da vida: Deica logo, Alecrín

Nesta terra nosa na que moitos e moitas agochan o seu ollar e seguen a camiñar, nunca nos merecimos dispor de Alcreín. A moitos esta verba non lle dirá nada ou pouco, mais eu, que estou sempre a favor de mellorar a sociedade, sei polo menos que Alecrín foi a primeira asociación feminista en Galicia en apoiar e solventar problemas de mulleres.

Claro, as mulleres esas que Alecrín atendía eran prostitutas, mulleres maltratadas. Quen ten realmente interese por rescatar a esas aloucadas que fan do sexo un negocio ou que fan da súa situación persoal de maltratamento ou desamparo unha cuestión mediática? Agora, despois de vinte e cinco anos, ninguén. Porque en Alecrín hoxe é o último día de traballo.

Alecrín pecha as súas portas, e non pola crise global e o despedimento masivo ou as ERE. Estas cousas non afectan tanto a unha asociación. Acontece que se precisan medio millón de euros anuais para mantela. Algo máis de 80 millóns das antigas pesetas. Non moito, se pensamos nas 34 empregadas que sostiñan este labor social sen precedentes en Galicia.

Algúns quizán non perceben que unha acción contundente é necesaria para frear os abusos sobre as mulleres. Pena que non suceda como no conto de Homero, onde o monstro de 7 cabezas volvía reproducilas cada vez que lle cortaban unha delas. Non, non hai sete alecríns nin sete institucións que se ocupen das mulleres en situación de precariedade. Non nesta Galicia que tanto o precisa.

Alecrín é un referente de compromiso social. Moito máis que os voluntarios de tantas e tantas ONGs que hai polo mundo. Alecrín subministraba información e coñecía as técnicas deste traballo tan ingrato. Administraba tamén información que é confidencial, e outra pública, como a que foi necesaria ler e escribir ata acadar o recoñecemento do síndrome de alienación parental.

A quen lle interesa, agás ás propias interesadas, que desapareza esta asociación de extremistas radicais que aportaban unha saída a tantas persoas? A quen lle interesa que morra un dos sinais de identidade da Galicia progresista por mellorábel? Ninguén chora. E iso que esta asociación levaba 25 anos prestando servizo á mesma sociedade que non se altera.