Atopar unha mensaxe así a mañá despois de posuírme é como sentir que se lle cae a un o chan debaixo dos pes. Ben o sei.
Estou a proclamar que te esquecín.
Tempo despois de ti marchar, fiquei durmida como unha nena. Nos meus pensamentos estaba o desenvolvemento da novela que estaba a ler cando me deitei.
Antes diso estiven ocupada en recoller o lixo que deixamos entre os dous: esa longa lista de subprodutos do amor. E despois volvín ás miñas paixóns como se nada.
Estou a proclamar que te esquecín.
Malia todo, aquí estou para dicirche que te esquecín. Polo menos é algo, dadas as circunstancias.
Sei que o entenderás. E espero que comprendas a túa parte de responsabilidade no meu esquecemento de ti.
Estou a proclamar que te esquecín.
Nunca me fixen ilusións. O que provocaches en min vai máis alá de perder ese formígueo no bandullo.
Constitúe unha declaración de non amor. De total indiferenza. De derrota do amor e de triunfo da ilustrada razón. Que non é pouco.
Estou a proclamar que te esquecín.
Entregar o teu amor a alguén é voluntario, como algún día saberás con esa intensidade que fará que tolees.
Non tolear como o fixemos ambos os dous estes días pasados. Tolear como un auténtico tolo.
Estou a proclamar que te esquecín.
Non foi como a primeira vez. Foi mellor nalgúns aspectos. Mais non sentín que se me fora a vida en ti, dentro de min.
Porque iso é en definitiva o que se pretende. E por iso é polo que se adoita suspender a razón mentres a paixón nos controla.
Estou a proclamar que te esquecín.
Despois de ti marchar, nun intre que non podo identificar, da duración do voo dunha volvoreta, lembrei outro home que non es ti.
Lembreino con nostalxia. O cal pode interpretarse como decepción. Comparar non é das cousas que fas satisfeita.
Estou a proclamar que te esquecín.
Así que lembrei outro home. Desexei que ti tiveras sido el. De contado que lle sacaría partido a esa arma de destrución masiva que te levaches contigo.
El nunca o deixaba mentres eu non chegaba á fase mística, esa na que grito "Deus...". E ata abondo despois.
Estou a proclamar que te esquecín.
Podes dicir que estou a proxectar algunha rara sintomatoloxía freudiana sobre ti. Que é inxusto compararte co mellor amante que nunca tiven, amor.
Que algo haberá do que me poda gabar verbo do acto de posuírnos o un ó outro.
Estou a proclamar que te esquecín.
Nenhum comentário:
Postar um comentário